Bygelowe

Gesoek:  jou kommentaar, siening en mening oor bygelowe. Stuur dit na st@pitkos.co.za en merk in subject line “Bygelowe”. Vertel vir ons van bygelowe wat aan jou bekend is en ook jou ondervinding daarvan.

Hieronder volg ‘n nuusbrief soos uitgestuur op 18 Oktober 2006. Die briewe en reaksie volg direk onder na die nuusbrief.


Vrydag die 13de

Ek word gevra om ‘n praatjie te kom doen by ‘n hoërskool. Op Vrydag die 13de. Die radioprogram Monitor van RSG  vra my om ‘n radio-onderhoud te doen. Ook op Vrydag die 13de. En die onderwerp van die radio-onderhoud: Vrydag die 13de.

Die praatjie (per telefoon vanuit Johannesburg) geskeduleer vir 07:50. Die praatjie in die skoolsaal geskeduleer vir 08:00. Ek maak gebruik van my “time management skills” en reël dus met die hoof van die skool persoonlik dat die omroeper van Monitor my direk by die skool skakel en ek dadelik daarna my praatjie in die saal kan doen. Vra hom ‘n stil kantoor. Geen probleem nie, verseker die meneer my. Alles sal in orde wees. Ek praat en reël ook met die juffrou wat die praatjie organiseer.

Vrydagoggend is ek betyds by die skool. Juffrou lei my na die kantoor waar ek moet praat. Telefoon is daar, die dames by die skakelbord is in kennis gestel dat RSG gaan skakel. Alles reg en in plek. Ek is gereed om vrae te antwoord en insette te lewer oor Vrydag die 13de en die sielkundige effek daarvan op die mens.

Die telefoon lui – dis die omroeper van Monitor. Tel die sekondes af voor ons op die lug gaan. Net toe ons begin praat, besluit die hoof van die skool hy wil nóú op die interkom praat. En hier sit ek in hierdie klein kantoor, met die hoof se stem wat bulder oor die interkom sodat ek nie die omroeper oor die telefoon kan hoor nie. Ek bedoel soos in feitlik glad nie. Die luidsprekerkassie sit hoog teen die muur in die kantoor. Wat kan ek doen, vasgevang in die kantoor en ons is lewendig op die lug? En intussen klop ‘n ander onderwyseres om in die kantoor te kom. En maak die deur oop en loer rond. Ek kan nie dink nie, ek kan nie die omroeper hoor nie, want die hoof  praat aanmekaar hard en luid. Dit word ‘n NAGMERRIE in hoofletters!!

Ek het al redelik baie onderhoude op radio gevoer met goeie sukses, maar hierdie onderhoud is ‘n absolute fiasko – ek voel geweldig ontsteld oor die voorval! Moet ek die fiasko blameer op Vrydag die 13de of is dit bloot onkunde of onbevoegdheid van ‘n instansie wat nie bekend is aan die praktyk van ander instellings buite ‘n skoolomgewing nie?

Die juffrou kom vra groot verskoning. Vra selfs of die skool vir Monitor ‘n brief moet skryf om te verduidelik en apologie aan te teken. Ek is platgeslaan maar moet dadelik myself hergroepeer en my emosies onder beheer kry vir die praatjie in die saal.

Tot vandag toe het ek nie veel erg aan bygelowe gehad nie, maar is hierdie nie ‘n bewys van die spook van Vrydag die 13de nie?

Sal ek weer op ‘n Vrydag die 13de op die radio praat? Hoe moet ek hierdie slegte gebeurtenis verwerk en hanteer?

Ek doen die volgende: 

·     Ek sal my nare ondervinding nie aan Vrydag die 13de toeskryf nie, maar eerder aan ander faktore.

·     Ek sal weer op die radio of waar ookal praat op Vrydag die 13de. Net om die punt te staaf dat ons nie uitgelewer is aan allerhande bygelowe nie.

·     Ek sal nie vashaak by hierdie teleurstelling en terugslag nie, maar steeds net my beste doen. Môre skyn die son weer en die genade van die Here is immers genoeg vir my.

·     Ek sal die humor in die situasie probeer raaksien, want om te lag is goed vir jou gesondheid en salf vir jou seer gemoed.

Dit bring my by die punt waarom ons in ‘n moderne tyd nog so bygelowig is? Hoekom is dit dat vele hotelle nie ‘n dertiende vloer het nie – daar moet blykbaar ‘n lugleegte wees tussen die twaalfde en veertiende vloer. En kyk maar hoeveel hysbakke het nie ‘n nommer 13 knoppie om te druk nie. Selfs sommige hospitale - wat veronderstel is om ‘n rasionale wetenskaplike plek te wees – het nie ‘n teater nr 13 nie.

Hoe het die bygeloof van Vrydag die 13de onstaan? Wel, daar is nie sekerheid daaroor nie. Blykbaar kom dit voor van baie lank gelede - daar word byvoorbeeld in die Noorse mitologie ‘n fabel  vertel van ‘n maaltyd vir twaalf mense met ‘n dertiende persoon wat opdaag en die dodelike gevolge daarvan.

Die bekendste voorbeeld is egter die laaste maaltyd van Jesus voor sy kruisiging. Tradisioneel word dit as ‘n Vrydag beskou, hoewel sekere skrywers meen dit was ‘n Woensdag. Dus dertien mense op ‘n Vrydag sit aan by ‘n maaltyd. En een van hulle is Judas die verraaier. Dit is ook Judas wat eerste opstaan en uitstap. En dit is ook Judas wat eerste dood is. 

·          Wat is volgens jou ‘n bygeloof? Hoe ontstaan dit?

·          Het jy ‘n bygeloof?

·          Is gelukbringers ‘n vorm van bygeloof ?

·          Is daar in die morderne tydsgewrig nog plek vir bygelowe?

·          Hoekom dink jy het mense bygelowe?

·          Is daar sielkundige redes vir ‘n bygeloof?

Ek hoor graag jou kommentaar op hierdie vrae en enige ander ondervinding wat jy het met betrekking tot bygelowe wil deel.


Kommentaar, menings en reaksie van lesers

Dr.Potgieter - ek kan my nogal die prentjie by die skool voorstel en jou ontsteltenis verstaan – ek glo dat die orde by skole soggens maar versteur is, en dat die insident blote toeval was , omdat die skoolhoof dalk nie die personeel ingelig het nie , en toe self vergeet het!! Moes seker eerder êrens ñ nota op gesit het sodat almal kan sien – ek werk vir die Dep. Van Gesondheid.

Ek en my 2 susters verjaar  al 3 op die dertiende – 13/2, 13/6 en 13/12 – vraag is blote toeval of ongeluksvoëls??? Nee, wat ons steur ons glad nie hieraan nie, en ons is geseënd met ñ God wat al sy genade daagliks op ons uitstort.

Elke  glo dat elke kultuur sy eie bygelofies het, wat nie skade sal doen indien jy nie die magte groter as God daarin sien nie....... Praat gerus weer op RSG! - Sandra
 


Hi daar Dr. – ek onthou toe ek nog ‘n kind was in ‘n klein weskus vrissersdorpie met die naam “Laaiplek” waar ek groot geword het. Tussen die vissermanne was die woord bygeloof nooit gebruik nie. Hulle het altyd vir daardie gebruik gesê jy is “siaal” – ‘n woord wat ons in die stad glad nie hoor nie. Ek moet sê dat ek ook aan bygelowe geglo het, tot een dag? Dit was die dag dat ek my hart vir Vader gegee het. Van daardie dag is bygelowe vir my ‘n “foefie” wat glad geen sien maak nie, maar my wel lekker laat lag vir die mense wat nog waarde daaraan het. Groete – Johan    ps. Ek geniet jou skrywes terdieë.
 


Middag Dr - ek het die verhaal van Vrydag die 13de baie geniet. Ek is ook by 'n skool en kan net dink hoe dit moes wees. Bygelowig is ek egter nie! Groete - Gherda
 


Dankie weer eens vir 'n oulike artikel oor Vrydag die 13de.  Ek kan my net indink wat 'n nagmerrie die hele gedoente oor die foon moes gewees het.  Ek's seker die skoolhoof voel nou nog sleg.  Hy het net seker nooit daaraan gedink dat die kantoor waarin jy besig was met jou onderhoud ook mos 'n interkom het nie.  Wat 'n aaklige ondervinding.  Wys net dat radiostasies maar liewer vooraf opnames moet maak.  Maar dit bly ironies dat dit alles op die 13de gebeur het. 

Ek het al opgelet dat die 13 ge-"skip" word by bv. tafels in 'n restaurant ook.  Hoe sê hulle altyd dat wanneer 'n mens bang is vir iets gebeur dit soms, omdat 'n mens verkeerde goed na jou aantrek met negatiewe gedagtes.  Dus is dit dalk dieselfde met die 13de.  As 'n mens verwag dat dit 'n sleg dag met "mishaps" sal wees, dan sal dit dalk gebeur.  Ek dink maar net nooit aan so iets nie. 'n Lekker dag vir jou en voorspoed met die praktyk.  Jy is die Kaap se Dr Phil. Groete - Wena
 



[ek weet nie of skoolhoof sleg voel nie, want hy het my nooit geskakel of  jammer gesê nie – ST.]

 

Ai, sommige mense darem.  Die man behoort so waar baie sleg te gevoel het.  So verskil die mensdom ne.  Ek sou 'n brief wou skryf ek sou so sleg gevoel het as ek hy was. Dit was natuurlik vir jou 'n groot verleentheid want jy't mos die reelings getref (die venue ens...) Groete - Wena


 Hallo ST - dankie dat jy hierdie nare ondervinding met ons deel. Ons ervaar ook dikwels hoe `n mens reëlings tot die uiterste toe tref en dan loop alles en nog wat skeef. Dan voel jy soos `n wurm. En dan lyk dit mos soms of dinge vir ander net glad loop. Jou bydrae laat my weer opnuut besef – ons weet nie nie van ander se ervarings nie. Dankie vir die weeklikse pitkos. Dis kos vir my siel! Glo ek aan die 13e? Gelukkig nie! - Elmari
 

Hallo ST -  Vrydag die 13de.  Jou hart moes in jou keel klop toe daardie luidspreker druis in jou ore.  Die ST wat altyd so gemaklik en in beheer is en ook so voorkom, se mat was vir 'n oomblik onder sy voete uit.  Nie 'n aangename ondervinding nie!  Gelukkig het jy nog iets bygekry waarvoor jy kan lag in jou oudag...

Ek wil graag antwoord op jou vrae:

Die ontstaan van 'n bygeloof is volgens my 'n konnektasie met slegte ondervinding. Sommige mense glo ook daarin as gevolg van indoktronasie van bv. ouers, maats, oupas en oumas en selfs onderwysers.  Dit is iets wat oorgedra word van geslag tot geslag.  Dit is vir jou om te besluit of jy dit sal oordra of dit net eenvoudig ignoreer.

Ek het nie 'n bygeloof nie.  Net 'n geloof.  Dit is in God drie-enig.  Sy genade en liefde is dit waarin ek glo en wil glo.

Gelukbringers is volgens my definitief 'n bygeloof.  Dit kan nie veroorsaak dat jy sal wen nie.  Oorwinning kom met harde werk en deursettingsvermoë en geloof in jouself.

Daar is nie plek of tyd in vandag se lewe vir bygelowe nie.  Ons moet gefokus bly op dit wat ons wil uitleef voor die einde van ons lewens.  Ons moet eerder daarvan werk maak om mense daarop te wys dat met Sy teenwoordigheid in ons lewe, verkry ons al die geluk wat ons nodig het.

Wanneer mense nie weet wie hulle is en waar hul siel hoort nie, hang hulle allerlei dinge aan.  Dit is eintlik jammer dat mense nie besef dat wanneer Jesus jou senterpunt is,  jy altyd kan kyk na Sy leefwyse en sien watter pad Hy gewandel het hier op aarde.  Hy het nie bygelowe of gelukbringers gehad nie.  

Ek weet ongelukkig te min van sielkunde om vir jou te antwoord op jou laaste vraag.  Ek glo dat dit miskien gepaard kan gaan met diepliggende vrese en moontlik die vraag:  "Wat as dit waar is en ek het my nie aan die bygeloof  gesteur het nie."  Hulle sal eerder nie die kans waag om dit nie te glo nie, in vrees wat moontlik met hul kan gebeur.

Baie dankie vir jou positiewe bydrae in my lewe.  Ek sien elke week uit na jou brief en wil saam met jou 'n skalkse glimlag gee oor Vrydag die 13de! Groete - Amelia
 


Dagsê Dr Pottie, ek sal bv nie sommer onder deur 'n leer loop nie, en as ek op plek is waar dit baie donderweer, maak ek die vensters oop en sit ligte af, dit is maar soos mens geleer het van jou oumas en ma's toe jy kind was maar eintlik is dit nonsens, dinge gebeur net en party dae is dit net nie jou dag nie.  Uit ondervinding het ek al geleer dat dinge gebeur in drieë.  Ook 'n ding aan die ander kant is dat hoe meer jy dink aan negatiewe dinge wat jy nie wil hê moet met jou gebeur nie, sal dit dan plaasvind of gebeur omdat jou " mind " te veel ingestel is daarop..Jy is bang jy kry kanker, jou brein stuur seker 'n chemiese stof af wat dan vir jou die groot k gee.  Positiewe dinkwyse is so belangrik, maar is nie altyd maklik om dit te behou nie

My ouma het gewoonlik die skëre weggesit, die spieëls toegegooi en radio's ens afgeskakel, en jy mag ook die telefoon gebruik het nie,  Die oumense in daai tyd was hulle reg of verkeerd, so is ons wat agtergebly het en groot geword het, met die gedagtes gelos. Groetnes - Ilze


Hallo ST - baie dankie vir die eposse van jou af, ek geniet dit baie. Wat Vrydag die 13e betref, ai, hoe kan 'n kind van die Here aan sulke snert glo. Gelukkig is ek gesëen met 'n goeie sin vir humor en geniet ek ( teen my eie beterwete) al die stories  rondom die dag. 'n Engelse vriendin van my praat van 'n " goeie sin vir humeur".  Mooi bly en sterkte met alles wat jy doen. - Ester
 


Geagte doktor Potgieter - wat Vrydag die 13e aanbetref, antwoord ek u vrae as volg:

1.'n Bygeloof is 'n geloof in iets wat nie 'n amptelike geloof is nie. Ek dink dit het juis ontstaan agv gebeutenisse soos die een wat u beskryf het, maw toevallig of as jy 'n Christen is, godsvallig. Ek dink ook dat bygelowe 'n klap in God se gesig is.

2.Ek het NIE bygelowe nie, maar wonder van tyd tot tyd (soos u) of daar werklik iets in steek.

3.Dit hang af van die waardegevoel van die gelukbringer. As jy sentimenteel is daaroor omdat jou meisie/vrou dit vir jou gegee het en dit jou aan haar herinner, is dit skadeloos. As jy egter glo dat dit jou help om te wen of jou teen onheil beskerm, is dit 'n bygeloof en weereens 'n klap in God se gesig.

4.Ten spyte van my siening is die geloof in gelukbringers wydverspreid.(in Engels "rife")

5.Ek dink die mense se inherente soeke na God of die bonatuurlike, sowel as hulle begeerte om 'n onregverdige voordeel te hê en/of teen onheil beskerm te word, dryf hulle na sulke goed.

6.Ek sal liewer nie 'n opinie lug oor sielkunde nie aangesien ek 'n rekenmeester is. Ek glo egter dat 'n Christen NET in die drie-enige God en Sy gebod moet glo, dit bely en uitleef. - Fanie
 


Dr Potgieter - baie dankie vir hierdie interessante brief en gedagte.  Graag wil ek net die volgende met u deel:

Ek het desjare by my oorlede moeder verneem dat as 'n uil op die dak van jou huis sit, dood in die familie beteken - dit was net 'n gedagte vir my, nooit my daaraan gesteur nie.  Ons het op Postmasburg gewoon en dié aand op die stoep gesit.  Later bemerk ek en my man 'n uil op my buurvrou se huis.  So maak ek die opmerking en noem die gedagte vir my man.  Ek gaan later kamer toe en hy sit nog 'n rukkie op die stoep. Toe hy kamer toe kom, sê hy daar moet iets groot fout wees by ons bure, want hulle staan buite en binne die huis en huil.  Vroeg die volgende oggend toe verneem ek hulle dogter is skielik oorlede aan 'n klont wat deur die long is en die dokters kon niks vir haar doen nie. Sy was op haar laaste swanger en gelukkig kon hulle die baba red.

Ek probeer om gladnie ag te slaan op bygelowe nie.  Ek sny dit dadelik uit my gedagtes en gee géén aandag daaraan in my lewe nie, want ek vóél dít kom nié van Jesus Christus af nie. Dit bloot 'n aanval op ons geloof en ons moet so iets uit kanselleer in die naam van ons Vader. Jesus groete - Annemie
 


 Hallo dokter - WOW - wat 'n ervaring! Ek moet sê, as ek in so 'n situasie was, sou dit my 'n hele ruk geneem het daarna om weer my selfvertroue op te tel en nie te voel ek het iets verkeerds gedoen nie. Dit is altyd die eerste ding wat ek wonder, wat het ek verkeerd gedoen of wat kon ek anders gedoen het, of het ek dan nou my tye of iets verkeerd onthou of gereël? Gelukkig vir ons ander gewone mense het dit nou hierdie keer met Dr gebeur wat baie meer ervaring het as myself byvoorbeeld. Jammer dit klink so kras as ek dit sê, maar ek sou eintlik dink dat ek verpletter gewees het vir 'n goeie paar dae.

Ek wil Dr gelukwens met Dr se "ek doen die volgende:" 10 uit 10. Dr is reg. Die genade van ons Here is genoeg vir ons.

(Ek moet sê ek sou ook gewonder het oor die "Vrydag die 13de" ding, maar ek weet ek sou dit ook soos Dr net verby laat gaan het. Ek glo nie in bygelowe
nie.)

·  Wat is volgens jou 'n bygeloof? Hoe ontstaan dit? Die ontstaan kanseker met oorlewering van familielede/gesinslede wees, bv. 'n kind van 'n ma en/of ouma, of pa en/of oupa wat bygelowig is, sal moontlik self bygelowig wees? 'n Ander rede kan slegte ervarings self wees - neem nou bv. Dr se 'Vrydag die 13de' ervaring - iemand anders sal dit verseker aan die Vrydag 13de bygeloof toedig.

·  Het jy 'n bygeloof?  Nee, glad nie.

·  Is gelukbringers 'n vorm van bygeloof ? Volgens my is selfs 'n "gelukbringer" een en dieselfde ding.

·  Is daar in die morderne tydsgewrig nog plek vir bygelowe? Ek dink nie so nie. Die beskikbaarheid van inligting en tegnologie, moet dit
sekerlik beïnvloed?

·  Hoekom dink jy het mense bygelowe? Ek mag verkeerd wees, maar ek dink daar is meer as een rede: Eerstens wil so 'n persoon meer 'in beheer' voel van slegte dinge wat gaan /kan gebeur, want wanneer mens in iets glo, dan gebeur dit gewoonlik so. Die gevoel is seker dat sulke situasies dan meesal vermy kan word? Tweedens is so 'n persoon van mening dat ons God nie in beheer van alles is nie, dat daar sekere dinge is wat God nie beheer nie.

·  Is daar sielkundige redes vir 'n bygeloof? Ja, definitief. Die gesegde van "it's all in the mind" is presies dit. Wat 'n mens gedurig aan dink, word wie jy is later. Volgens die Bybel, moet die kinders van God hulle besig hou met alles wat mooi en reg en goed is en in hulle gedagtes OOK, dus sal daar dan nie plek wees vir allerhande vrese en gedagtes nie - maar nou ja, ons mensdom is nie so eenvoudig nie, Dr sal beter weet as ek, of hoe?

Dankie vir die positiewe nuusbrief en brokkies elke keer. Sterkte met die groot taak. - Andra
 


Hi ST - juis omdat almal so 'n ophef oor Vrydag die 13de maak - glo ek dit is my gelukkig dag.  Miskien omdat ek juis die dag so positief aanpak - kom ek nie agter as iets skeef loop nie.  Glo dit is maar net een van daai dinge wat op my pad moes kom. 

Ek glo nie regtig aan gelukbringers nie, maar is tog maar bietjie skrikkerig vir die bygelowe.  Soos bv. 'n swart kat oor die pad, onder deur 'n leer stap ens.  Kan nie se of dit regtig so is nie, want 'n tyd terug het daar 3 keer dieselfde week 'n swart kat oor die pad gehardloop voor my kar.  Het nogals gewonder wat sou gebeur, maar kan nie onthou of daar iets erg gebeur het nie. Die kat wou seker maar net na sy huis toe.

Ek dink mense is bygelowig, omdat hulle iets soek om in te glo.  Dalk is hulle geloof in God net nie sterk genoeg nie- (nie dat myne 100% is nie).  Daar is mos iets oor 'n verskietende ster ook - as jy een sien moet jy wens.   Ek het bv. my kinders geleer as jy 'n verskietende ster moet jy nie wens nie, maar bid -(en ons mag vir mekaar vertel wat ons gebid het).  Hoop jy het 'n wonderlike dag. Groete - Karien
 


Hallo Salomon - Jy praat oor die nagmêrrie daardie dag, maar ek glo soos jy:  GAAN JOU VRESE TEGEMOET anders Word dit 'n bygeloof - en glo my, dis nie lekker om altyd in iemand se geselskap te wees wat die 13 vrees, en veral as dit Vrydag is nie.  Hulle word SUUR mense op daardie dae. so negatief dat mens self voel om dan liefs die aardbol te verlaat. 

Jou ervaring was bloot deur die arrogansie van die skoolhoof - ek was lank in die Onderwys en ken daardie volk te goed - hul dink hulle is beter as God en ALLE mense moet onder hul buig… soort van.  Nie almal is ewe erg nie - kyk maar ook na die onderwysers wat lewenslank onderrig gee - behandel almal asof jy deel is van hul "Onderdane" die kinders, en verwag as hul praat, moet jy op aandag staan ....  Ek wou nie so wees nie en het my lewe lank daarteen geveg - toe betyds die Onderwys verlaat en besef mens kan GOD op ander plekke net so dien, indien nie meer nie.  Die tonnelvisie raak weg en mens word meer bruikbaar.

Dit moet eintlik 'n wonderlike dag wees. Baie goeie dinge het al met my gebeur op Vrydag die 13e - en ook ander no 13's. Vriendelike groete - Mien


 
Goeiemôre ST! -  Dit is `n Baie Goeie Môre - soos ook Vrydag die 13de - want dit is die dag wat die Here gemaak het! Ek glo nie dat enige persoon (skepsel), enige konnotasie moet heg aan die getal 13 nie... Ongelukkig beteken dit vir jou dat dinge vorentoe op enige ander dag, ook kan skeef loop, al is dit nie Vrydag die 13de nie - so: "Kyk wyd!"

Kom ek verduidelik vir jou hoekom ek so sterk voel daaroor:

Vier jaar en twee maande gelede het die Here `n besonderse "uitdaging" oor
ons pad gestuur - Na drie kinders, elk vier jaar uit mekaar, ontdek ons tot ons groot skok en verbasing - ek is weer swanger!

Dit was regtig `n krisis vir ons, nie net oor die blote feit dat ek swanger is nie, maar omdat ek met die laaste swangerskap baie komplikasies gehad
het.  Ek het pre-eklampsie (hoë bloeddruk in swangerskap), `n baba wat "small for dates" was en komplikasies met die laaste bevalling ook
gehad...Ek en die baba het die geboorte nouliks oorleef.  Klein Wian moes dadelik na geboorte intensief toe - in `n suurstoftent, drup op, x-strale
van sy longe en ander goed, wat ek nou nog nie mooi uitmaak nie... Ekself het plat op my rug gelê - bloeddruk 260 oor 180...  Die verpleegpersoneel sê
ek mag nie roer nie - nie eers om my baba te sien nie...  En daar is dit nou vier jaar later - en hier is weer `n ou babatjie oppad...

Ek en my man het baie geworstel.  Wat staan ons tog te doen?  Ek het my vorige dokter en ginekoloog gekontak en ook nog `n onafhanklike opinie
gekry, en almal het saamgestem dat die swangerskap onmiddellik (toe agt weke ver) getermineer moet word... Ons het net een groot probleem gehad - ons is christene - en ons glo glad nie aan aborsie nie...

Uiteindelik het die Here `n baie goeie ginekoloog in Pietersburg, oor ons pad gestuur...  Ons het alles voor hom op die tafel gesit en sy opinie gevra.  Hy het `n sonar geneem, my bloeddruk geneem, die kroniese medikasie gevra, my gewig geneem en bloedtoetse laat doen, onder andere...  Toe vra hy om met ons te praat.  Ons het ook vir hom gesê dat ons nie die swangerskap wil termineer as daar enige ander uitweg is nie, maar ons het ook geglo dat dit nie die wil van die Here is dat ek en die baba sterf of dat die baba gestremd is, en my man dan die drie ander kinders alleen moet grootmaak nie...Dr. Willie het gesê dat hy ook `n christen is - wat wonderlik is - ek kan jou nie vertel nie, die eerste Dr. wat enigsins hoop het en positief is! Hy het gevra dat ons nie termineer nie - dat ons dit `n kans moet gee, en hy het ook belowe dat ons op sy persoonlike intensiewe sorg en ondersteuning kan reken...

Ons het `n lang pad, die nege maande, saam geloop...  Alles het goed afgeloop... Ons was positief, het die medikasie baie versigtig, maar getrou geneem, ek het van my kant af gereeld ligte oefening gedoen, my nie ontstel oor onbenullighede nie en `n baie gesonde dieet gevolg... Alles was beplan - hierdie keer `n beplande keiser - 19 Junie 2006...

Die Here het dit toe nie sò beplan nie.  My water het gebreek 20:00, 12 Junie 2006... Ek en Willem het dadelik `n oppasser vir die kinders gereël en deurgery Pietersburg toe.  Klein Nika - net 2.2kg - maar blakend gesond, is presies om 12:00, met `n noodkeiser, op Vrydag die 13de 2003 gebôre!!!

Ek was maar seer na die keiser - maar alles het wonderlik afgeloop...Nika is nou drie jaar en vier maande oud... Sy is `n pragtige dogtertjie...Blonde haartjies, blou ogies, lag altyd...`n seën vir ons en ook vir almal om haar...  Haar naam is afgelei van Domenique - wat "Born to God" beteken...

Vrydag die 13de sal nooit weer vir ons `n negatiewe konnotasie inhou nie. Ek is sommer vies ook - as mense sê dinge loop verkeerd op dié dag...

Wat jou vrae betref:
1.  `n Bygeloof is iets buite die nornale, iets wat nie sin maak nie, wat mense in glo...
2.  Hoe ontstaan dit? - Toe Nika klein was, het Willem altyd uit die bloute by die huis opgedaag wanneer sy begin huil het.  Ons bediende het naderhand
geglo sy "roep" hom, en dat ons in ons spore moet trap as sy begin huil - want die baas gaan nou-nou kom, en dan kom hy! Jy sien wat ek bedoel, maar
ek dink mens moet die ingesteldheid hê.  As jy daarvoor soek en gefokus is daarop, sal dit vanself kom...Jy sal wel iets kry wat gebeur het - wat jy
met `n geloof kan verbind - as jy wil!
3.  Ek dink tog gelukbringers is `n vorm van bygeloof.  Ek dink nie dis net `n vorm van bygeloof nie, ek dink ook dis `n vorm van afgodsdiens.
4.  Kyk hoeveel van jou e-posse begin of eindig met "As jy hierdie een aanstuur na soveeel mense, sal goeie geluk,geld,liefde uit die bloute binne soveel of solank verskyn?  Ek sou dink ons het lankal met hierdie goed klaargemaak, maar hoe groter die leemte in mense se lewens word - hoe meer probeer hulle dit vul met ander goed.  Maak dit sin?
5.  Geantwoord deur bostaande?
6.  Ek dink bygelowe is definitief sielkundig.  Die mens is `n lisigene wese - hy wil graag - moet eintlik - aan iets glo...

Dit was nou `n lang storie.  Ek weet nie of dit vir jou iets gaan beteken nie, maar ten minste het ek dit ook nou van die hart af gekry...

Baie Dankie weer vir `n baie interessante en opbouende nuusbrief! - Nicola
 

Hallo ST - ja, bygelowigheid bly 'n toffie in ons samelewing. Dink maar net aan onder deur die leer stap, gelukbringers van sportspanne, ens. Daarby is dit vir baie van die swart gemeenskappe in ons land 'n baie groter kwessie - ek hoor van die "boererate" teen HIV/Vigs om maar een van die "modernste" te noem.

Maar vir die Christen bly bygelowe altyd 'n taboe. As ek my voorsiening verwag uit die hand van die Voorsiener, kan ek nie verstrengel raak in energie-tappende bygelowigheid nie. Dit is tyd dat Christene erken dat hul nie deel het aan so baie van die dinge wat ongelukkig deel van ons Suid-Afirkaanse kultuur geword het nie, bv. Lotto, sterre voorspel, palmlees ens.

Ek salueer jou vir die houding wat jy inneem: wat met jou gebeur het op Vrydag 13 Oktober (vir slegs 10 min lank), het niks te doen met die datum nie, maar doodeenvoudig omdat die lewe gebeur...Dankie dat jy die moed het om jou debakel hardop te erken, daaroor te praat en jou kop op te tel om die mislukking vierkantig in die oë te kyk.

'n Slim ou het gesê dit verg moed om jou "stumbling block" te verander in 'n "milestone" en nie 'n "gravestone" nie. Doe so voort!! Groete - Elzette
 


Hallo ST - jou ervaring by die hoërskool het myns insiens niks met Vrydag die 13de te doen nie. Dit was die gevolg van 'n mens wat in sy gewone werkomgewing 'n ander mens se ''werkomgewing'' moes akkommodeer en, soos jy in jou nuusbrief gesê het, nie al die fynere puntjies van radiowerk in aanmerking geneem het nie. Ek sou eerder sê die oorsaak van die fiasko was 'n gebrek aan GOEIE kommunikasie en nie bygeloof nie.

Met GOEIE kommunikasie bedoel ek dat jy nie die skoolhoof ingelig het dat jy absolute stilte en geen onderbrekings van enige aard wil hê nie. [ek het dit wel aan hom gesê – ST.]

Die skoolhoof het jou ook nie ingelig oor die skool se roetine of werkwyse nie en jy het nie daaraan gedink nie, want om 'n skool te bestuur, is nie deel van jou werkwêreld nie.

Lewer gerus weer praatjies op Vrydag die 13de, MAAR probeer om meer tyd tussen afsprake te kry vir al die daaglikse katastrofes wat op enige dag van die jaar kan voorkom, en probeer maar om jou radiopraatjies liewer van die kantoor af te doen waar jy beheer het oor die omgewing. (Heng, klink my ek moes verder gegaan het as Sielkunde 3!)

Wat is 'n bygeloof? HAT sê dit is geloof wat die natuurlike en bonatuurlike vermeng. Dit is baie raak beskryf, want 'n mens glo natuurlike verskynsels of fenomene het bonatuurlike ''magte''. Ek het egter geen idee hoe en waar 'n bygeloof ontstaan nie, maar ek sou sê die meeste het waarskynlik ontstaan in die antieke tye toe mense nog nie so ''wetenskaplik'' ingestel was nie.

Ek het nie self 'n bygeloof nie en sou myself ook nie as bygelowig beskou nie. Vrydag die 13de was vir my 'n doodgewone dag. Die verkeer tussen die Strand en Kaapstad was ''normaal'', so ook my werkdag. Trouens, Maandag die 16de was vir my 'n slegter werkdag as Vrydag. Ek is nie versigter vir 'n swart kat wat oor my pad loop nie as vir enige ander kat nie. Ek loop wel nie onder 'n leer deur nie, want dit is gewoon dom. Die ding kan enige tyd omval, so ook 'n stellasie van enige aard. Haai, nou kan ek nie eens aan nog 'n bygeloof dink nie. Daar is een, ek kan nie onthou wat nie, waarvoor jy sout oor jou linkerskouer moet gooi as jy die uitwerking daarvan wil keer.

Gelukbringers kan seker 'n vorm van bygeloof wees as 'n mens obsessief begin raak daaroor.

Ek dink ons hedendaagse mense behoort rasioneel genoeg te wees om nie toe te laat dat bygelowe hul lewe oorheers nie. Ons christelike lewensbeskouing laat ons ook nie toe om bygelowig te wees nie, want God is tog groter as hierdie bygelowige ''bedreigings''. Mense het seker maar bygelowe omdat hulle iets meer konkreets soek om in te glo; ek weet nie regtig nie. Die meeste bygelowe is egter deur duisende geslagte van die een geslag na die volgende oorgedra - die dat ons vandag nie regtig weet waar al die goed vandaan kom nie.

Ek dink daar kan sielkundige redes vir bygelowe wees, maar dit sal uiteraard van mens tot mens verskil na gelang van die graad van bygelowigheid. Is daar nie iemand wat al 'n doktorale studie oor bygelowigheid gedoen het nie? Dit sal interessante leesstof wees. Groete en lekker dag - Mariette
 


Haai ST - hier vind ek toe vanoggend jou e-pos weggesteek onder "Junk-Mail". Watse nonsens is dit nou, gelukkig is dit spoedig herstel. Ek geniet jou lekker geselsies, baie dankie vir jou weeklikse moeite ! Dit bewys eintlik net dat, maak nie saak hoe besig jy is nie, jy kan deur effektiwe tydsbeplanning altyd tyd "maak" ! Oor jou RSG geselsie, ek is werklik beïndruk met die wyse hoe jy die situasie, na die fiasko, insien! Puik !Vreemde woord die "puik", of hoe?

Oor Vrydag die 13de: Volgens my is bygeloof 'n sonde / soos die Woord van God sê ! Ek probeer alles uit 'n christelike oogpunt bekyk en daarom steur ek my nie aan sulke nonsies nie ! Gelukbringers is defnitief 'n deel van bygeloof. Dis altyd vir my lagwekkend hoe party mense meer geloof het in die sogenaamde
gelukbringers as in God. (Gelukbringers se ontstaan en wortel is direk afkomstig van Buddisme ! ) God, soos Sy Woord - was, is en sal altyd dieselfde wees - daarom dink ek, maak nie saak of ons in 'n moderne samelewing is nie, alles in die Bybel is nog steeds van krag.Ek dink mense het bygelowe omdat hulle in vrees lewe en is onder die indruk dat bygelowe hulle sal / kan beskerm ?! Shalom - Andries


Hi daar - dit is goed om weer van jul te hoor, dankie vir die gereelde vormings tekste. Ek wil net graag ietsie noem oor bygelowe.

Ek dink dat almal ‘n God dien met verskillende benaderings omdat die mens geskep is om onderdanig te wees. Wat sin maak vir die een groep aanbidders is nie noodwendig wat saak maak vir die ander groep nie.

Elke groep neem ‘n vorm van geloof aan, soms sonder ‘n grondlegging of fondament of anders met verregaande beginsels wat nie logies oordenk kan word nie.

As ons byvoorbeeld kyk na die vermeerdering van die brode en vissies in die Bybel: Sommige glo dat Christus Jesus nooit die brood vermeerder het nie. Hul siening is dat die ander omstaanders hul kospakkies versteek het omdat hul nie wou deel nie en skaam geword het omdat die seuntjie bereid was om te deel, toe eers hul kospakkies uitgehaal het. Hierdie vorm van benadering is die teengeloof van die beginsels van die Bybel. So word verskillende weergawes gegee van die verhale en sommige omdat hul geen grondlegging van die waarheid het nie neem hierdie vorms van bygeloof aan.

Soos die slagspreuk “ If you don’t stand for something, you’ll fall for everything”

Om nie eers te noem van die groot verleier agter al hierdie bygeloof nie (die slang). Hy sal alles in sy vermoë doen om die teendeel te bewys van die skepper (Drie Eenheid). Integriteit is deesdae ‘n moelike lewenshandeling vir die mensdom. Dit is in vandag se tyd baie makliker om alles te glo om in guns van mense te wees, as om fondamenteel te glo en deur mense uitgewerp te word.

Matteus 10:32,33 …. ‘Nie almal wat sê Here Here sal die koninkryk van God beërwe nie, maar hy wat die wil van God doen’. Bygeloof is die norm voor die wederkoms van Christus. Openbaring …. “hy (slang) sal so ver gaan om tot die uitverkorenes te probeer verlei as hy (slang) kan”. Groete - Henrico
 



Wat is volgens jou ‘n bygeloof? Hoe ontstaan dit? ’n Bygeloof voel ek is iets diep in jou binneste waarvoor jy n groot vrees het en die duiwel en jou versteekte sondes gebruik dit om jou vreesbevange te maak.
· Het jy ‘n bygeloof?  Nee
· Is gelukbringers ‘n vorm van bygeloof ? Ja
· Is daar in die morderne tydsgewrig nog plek vir bygelowe? Nee! Met God se genade en Sy liefde en onderskraging is daar nie plek vir sulke onsinnighede nie. Vanoggend op radio Tygerberg het die prediker gese' dat God ons in Sy regtehand vashou. Watter groter versekering wil ons dan he'. Daarom dat God se, glo sonder om te sien. Maar die mense wil sien om te glo daarom al die swakhede in ons lewens
· Hoekom dink jy het mense bygelowe? Bygelowe en die woord "spoke" kom van die vroeer jare af. Ek voel meer dit was gebruik gewees om mense af te skrik. Daar is in elk geval nie iets soos spoke nie, dis demone. Bygelowe kom ook van ons voor ouers af en is oorgedra van geslag tot geslag.
· Is daar sielkundige redes vir ‘n bygeloof?
As jy n opregte kind van God is en regtig n oorgawe gemaak het en tot bekering gekom het, het jy nie nodig om te glo in bygelowe nie.

Om net alles hier bo te bevestig. Ek het laasweek Vrydag die 13 Oktober 45 jaar oud geword. Daar het niks verkeerd geloop nie. Matter of fact ons klompie mense het heerlik saam gekuier en almal het veilig by hulle huise aangekom. Die ding van vrydag die 13 de, swart katte en moenie onder lere deurlope nie is n gevolg van ongelowigheid. God se',  as gevolg van onkunde gaan my volk ten gronde.

Ek is heeltemal teen bygelowe en glo glad nie daaraan nie. Dis van die duiwel en sodra so iets in ons lewens opduik moet dit vir ons n bewusmaking van ons of n sonde is wat wil oorheers in ons lewens.

Dankie ST vir jou besonderse wyse waarop jy ons op hoogte hou en ons so ook op jou manier geestelik voed. Ek sien elke week uit na jou nuusbriewe. Lekker week verder vir jou en die Here se seën is met en op jou. Mooi dag. Regards André
 


Môre Dokter - ek het toevallig die onderhoud gehoor oppad werk toe!  Ek kon heel tyd die hoof se stem in die agtergrond hoor, maar u het uself nog steeds goed van die taak gekwyt ten spyte van al die steurings! Lekker dag - Mari


Hi Dr Potgieter - die mens is ‘n snaakse wese.  Indien iets op ‘n anderdag verkeerd sou loop in jou lewe, sou jy nooit dit toevoeg met ‘n datum of spesifieke dag nie.  Indien dit dan nou op die 13de en op ‘n Vrydag gebeur word gou gesê :  ek het geweet iets gaan seker vandag met my gebeur.  En onmiddellik word dit toegeskryf aan daardie “ongelukkige“ nommer en dag.

Ek glo dat indien jy nie jou innerlike sterkte gebruik nie, trek jy daardie ‘onheil’ na jou.  As jy heeltyd glo iets gaan gebeur, word jou liggaam swak vir enige aantrekking – d.w.s jou geloof word swakker en jy glo dat iets met jou gaan gebeur.  Hoe meer jy dit vertel aan ander of dink aan iets sleg of swak wat kan gebeur – trek jy daardie swakte aan.

My ouma het altyd die sêding gehad (wanneer ons “gewonder” het oor iets wat “dalk” kan gebeur wat ons nie graag wou gehad het moet gebeur nie): “WYK, SATAN, WYK – MOENIE JOU NES IN MY HUIS KOM MAAK NIE”.  Nodeloos om te sê – sy het summier ons monde toegedruk en gesê sy wil nie weer hoor dat ons ‘n slegte uitspraak maak van iets wat nog nie gebeur het nie.  

So, wat ek eintlik wil sê, jy moet positief ingestel wees, vermy die negatiewe denke en bou op goeie, mooi en wonderlike denke.Ek glo dit help, dit het my al baie gehelp en ek gebruik ook soms hierdie uitdrukking van my ouma – met humor en ‘n lag gepaard daaroor.  So onthou ek my ouma ook en ek dra dit natuurlik aan my kinders ook oor vir die toekoms!

Ek weet u is baie gelowig, so ek sou graag wou weet waaroor u praatjie gegaan het – NEGATIEF miskien met al hierdie toevallige insidente en was die omgewing dalk reg vir hierdie gebeure met die radio?  Dalk was iemand (dalk u of die organiseerder van die skool) bang dat iets kon voorval!  Dalk moes u dan ook my ouma se spreekwoord gesê het! Geniet u dag. - Susan


Hallo Dr - ek het toevallig na die onderhoud op RSG geluister en dit het darem nie té erg geklink nie. Nog ‘n bygeloof is vliegtuie wat nie ‘n ry nr 13 het nie. Groetnis - Johan
 


Beste Dr Potgieter - ek is regtig jammer dat jy so ‘n nagmerrie beleef het op Vrydag die 13de, maar kom ons skuif  die 13de bietjie eenkant toe.  Dieselfde plek, dieselfde tyd sou presies dieselfde met u gebeur het.  Die datum het absoluut niks daarmee te doen nie.  Die skoolhoof doen dalk elke dag op daardie tydstip sy aankondigings, en hou in gedagte dit gebeur nie elke dag dag hulle gassprekers by die skool het nie.  U laat egter na om te se hoe die res van u dag verloop het.

Elke persoon wil graag die blaam plaas op iets of iemand indien iets skeef loop!!  Dit is menslik, maar om ‘n syfer te blameer vir swak tydsberekening – ek dink nie so nie. My persoonlike doelwit is om daagliks wanneer ek getrotseer word deur  negatiewe invloede, die teendeel te bewys.  Kom ons hou duimvas vir die volgende Vrydag die 13de, ek is seker dit gaan vir u ‘n persoonlike oorwinning wees om dit ‘n absolute wen dag te maak.

Groete en baie dankie vir al die inspirerende boodskappe, ek het gisteraand na Vic Vermeulen geluister en ek is vandag eers op ‘n “high” , ek dink my kollegas gaan sukkel om vandag by te hou met my energie en dankbaarheid. - Janet
 


Geagte Dr. Potgieter - ek is nou een wat glad nie glo in bygelowe nie. Ook nie aan hierdie kettingbriewe (“stuur aan 5 mense of........) nie. Ek glo dat alles wat oor mens se pad kom ‘n doel het, en die Here stap saam met jou daardie pad. Hy sê daar sal niks oor jou pad kom wat jy nie sal kan oorbrug nie. Ek  het al baie beproewinge in my lewe gehad, en Hy het maar net elke keer vir my ‘n sterker mens laat uitkom aan die ander kant. Baie dankie vir die leesstof, ek waardeer dit en leer daaruit. Lekker dag - Melanie
 


Dr Potgieter - ek dink die onsekerheid, met ander woorde die tekort aan kennis en verstaan van die situasie dra by tot die onsekerheid wat bygelowe laat voortleef.

U situasie by die skool word nou uitgelig omrede dit Vrydag die 13e is maar sou dit ‘n maand tevore in die selfde omstandighede gebeur het was daar geen sprake eers van ‘n bygeloof nie. Vele mense sit en kyk na Vrydag die 13e met ‘n vergrootglas sonder dat hulle dit eers besef en die oomblik wat iets gebeur word Vrydag die 13e die eer daarvoor gegee. Groete - Jaco
 


Goeie more Dr. Potgieter - na aanleiding van die kostelike nagmerrie ondervinding van u – nee ek het nie erg aan enige bygelowe nie , miskien is ek naief maar ek het nog nooit dit as `n struikelblok beleef nie. My eerlike opinie is dat u ondervinding ook eerder toegeskryf kan word aan swak beplanning . Ek glo as die betrokke skool weer so `n geleentheid sou kry hulle dit heel anders sal benader en dit ook suksesvol sal aanbied .Ek stuur aan u sommer die paar mooi sinnetjies:

The greatest tests are the ones we view as stupid
We forget to tell those who are important to us just how much we care.
We forget that every cloud has a silver lining.
We view our problems as though they can never be solved.
We forget that there is always a tomorrow.
 We hold on to the past like it can help us through today.
We see challenges as a trial, forgetting that trials are what give us character.

Baie dankie dat u my lewe ook gereeld met kosbare gedagtes en ervarings aanvul. Hoor graag weer van u. Groete - Corrie


More sê - ek was heel verras om Vrydagoggend jou stem op RSG te hoor - ek was oppad Stellenbosch toe en het toe eers besef dat dit Vrydag, die 13e was! Lekker week - Suné 


Geagte Dr. Potgieter -  Jammer ek so lank draai met 'n opmerking oor 13 Oktober 2006. Ek weet daar is soveel mense wat glo dit is 'n slegte dag. Ons weet dat 13 die getal van Satan is en as dit op 'n Vrydag val dan is alles verkeerd, onderste-bo en ongelukkig. Toe ons Hemelse vader Lucifer, die mooiste engel uit die hemele gegooi het en verban het na planeet aarde het hy hom die planeet gegee. Die mooi engel wat hom ook mooi voordoen plaas allerhande snaakse gedagtes en gewoontes op ons tradisielys. Gooi sout oor die linkerskouer soort van ding, so ook Vrydag die 13de. Dinge loop verkeerd, want hy bepaal dit so, as ons ingee en al die dinge glo, dan word ons slawe van die "donkerkant" en hy kry lekker en maak siele bymekaar. Met al die gewoontes en tradisies wat strydig is met die van ons Hemelse Vader moet ons ernstig aan Sy voete lê vir krag, sterkte, insig en verstaan waar, hoe en wanneer. Hy het ons die verstand gegee, Hy het ons 'n Lewende Siel gegee, al wat ons moet doen is om Hom te dien en eer en aan Sy wette gehoorsaam te wees en nie toelaat dat die verleier ons leier word nie. Met ons ongeloof maak ons net die negatiewe sterker. In Sy Heilge Naam - Monica


Copyright © 2005 All rights reserved. Dr ST Potgieter
email: st@pitkos.co.za